Wednesday, August 8, 2007

ഭാവിയില്ലാത്ത ഭൂതങ്ങളുടെ വര്‍ത്തമാനം

'ധ്രുവീകരിക്കപ്പെട്ട ഒരു സമൂഹത്തില്‍ ആകാംഷക്ക്‌ വളരെയധികം സ്വാധീനമുണ്ട്‌.ഭാഷ,വര്‍ഗ്ഗം,പ്രദേശം എന്നിങ്ങനെയുള്ള നൂലിഴകള്‍ കൊണ്ട്‌ ബന്ധിച്ചിട്ടുണ്ട്‌ മലയാളം ബ്ലോഗുകള്‍ എന്ന സൈബര്‍ സമൂഹത്തെയെന്ന് പറയാമെങ്കില്‍,ആ നൂലിഴയെ മറക്കുന്ന വിധം അല്ലെങ്കില്‍ തകര്‍ത്ത്‌ കളയുന്ന വിധത്തിലുള്ള ചില കുത്സിത പ്രവൃത്തികള്‍ ചില ഭാഗങ്ങളില്‍ നിന്ന് ഉത്ഭവിച്ച്‌ കൊണ്ടിരിക്കുന്നു.അല്ലെങ്കില്‍ അത്‌ സംഭവിച്ച്‌ കഴിഞ്ഞു.
അത്‌ എങ്ങനെ,എപ്പോള്‍,ഏതിലെ,ആര്‌ എന്നിങ്ങനെയുള്ള സംന്ദേഹങ്ങള്‍ ഭൂരിഭാഗം പേര്‍ക്കും ഉള്ളതായി ഞാന്‍ മനസ്സിലാക്കിയിട്ടുണ്ട്‌.അതാണ്‌ ഞാന്‍ ആദ്യം പറഞ്ഞ ആകാംഷ.ആ ആകാംഷയെ ഒന്ന് കുളിപ്പിച്ച്‌ കിടത്താനാണ്‌ എന്റെ ശ്രമം.'

'അണ്ണാ,എന്തരണ്ണാ അണ്ണന്‍ പറയണത്‌.'

'കുഞ്ഞേ,വികേന്ദ്രീകരണം നടക്കാത്ത സമൂഹത്തില്‍ ധ്രുവീകരണം ഒരു സ്വാഭാവിക പ്രക്രിയയാണ്‌.അത്‌ ചിലപ്പോള്‍ രക്തരൂക്ഷിത വിപ്ലവം വഴി സംഭവിക്കാം.അല്ലെങ്കില്‍ ആശയങ്ങള്‍ തമ്മിലുള്ള സംവാദങ്ങളില്‍ നൂതനാശയങ്ങള്‍ മേല്‍ക്കോയ്മ നേടുമ്പോള്‍ നിയമനിര്‍മ്മാണം വഴിയും സംഭവിക്കാം.പക്ഷേ അതൊരു ജനാധ്യപത്യ വ്യവസ്ഥിതിയിലേ നടക്കൂ.'

'അണ്ണാ, ജനാധ്യപത്യവും സോഷ്യലിസവുമൊക്കെ പ്രസംഗിക്കാന്‍ ബ്ലോഗ്‌ എന്തരണ്ണാ ഡമോക്രാറ്റിക്‌ വ്യസ്ഥിതിയോ മറ്റോ ആണോ.അണ്ണന്‍ ചുമ്മാ കുപ്പീല്‍ കയ്യിട്ട്‌ ഇളക്കാതെ ഒള്ള കാര്യം പറ അണ്ണാ.'

'ടാ പുല്ലേ,നിനക്ക്‌ കേക്കാന്‍ പറ്റൂങ്കി കേട്ടാല്‍ മതി,എനിക്ക്‌ ഇങ്ങനൊക്കെ പറയാനേ പറ്റൂ.പറയണ എനിക്കും മനസ്സിലാകരുത്‌,കേക്കണ നാട്ടുകാര്‍ക്കും മനസ്സിലാകരുത്‌.അതാണെടാ യഥാര്‍ഥ ജനാധ്യപത്യം.'

'അണ്ണാ,കലിപ്പാക്കാതെ,ഞാന്‍ ചുമ്മാ പറഞ്ഞതല്ലേ.എന്തരണ്ണാ മലയാളം ബ്ലോഗേഴസിന്റെ ഇടയിലുള്ള യഥാര്‍ഥ പ്രശ്നം.ഒന്ന് തെളിച്ച്‌ പറ അണ്ണാ.'

'അതൊക്കെ വളരെയധികം പറയാനുണ്ട്‌.12ആം നൂറ്റാണ്ട്‌ മുതലുള്ള കാര്യങ്ങള്‍ പറയേണ്ടി വരും.നിനക്ക്‌ ക്ഷമയുണ്ടോ.'

'ഉണ്ടണ്ണാ,ഉണ്ട്‌.'

'ഉണ്ടെങ്കില്‍ കിടന്നുറങ്ങടെയ്‌.'

'അയ്യോ അണ്ണാ ഞണ്ണീന്നല്ലാ,ക്ഷമയുണ്ടെന്ന്.'

'ആണോ,എങ്കില്‍ കേട്ടോ.
12ആം നൂറ്റാണ്ടില്‍,അതായത്‌ മെസപ്പെട്ടോമിയ സംസ്കാരം രൂപപ്പെടുന്നതിനും മുന്‍പ്‌,സാര്‍ ചക്രവര്‍ത്തി ഗ്രീസ്‌ ഭരിച്ചിരുന്ന കാലത്ത്‌ തന്നെ തൊഴുത്തില്‍ കുത്തുകള്‍ ഉണ്ടായിരുന്നതായി ചരിത്രരേഖകള്‍ പറയുന്നു.'

'സാര്‍ ചക്രവര്‍ത്തി റഷ്യയല്ലേ ഭരിച്ചിരുന്നത്‌ അണ്ണാ.'

'ടെയ്‌,അണ്ണാക്കിലിട്ട്‌ ഒരു കുത്ത്‌ തരും ഞാന്‍.മിണ്ടാതിരുന്ന് കേട്ടാല്‍ മതി.ഭരിക്കുന്നവര്‍ ആരായാലും അതൊക്കെ സാറുമ്മാര്‌ തന്നെടെയ്‌.
അപ്പോള്‍ പറഞ്ഞ്‌ വന്നത്‌ തൊഴുത്തില്‍ കുത്തുകള്‍ ഉണ്ടായിരുന്നത്‌ കൊണ്ട്‌ 12ആം നൂറ്റാണ്ടില്‍ തന്നെ മലയാളം ബ്ലോഗുകള്‍ പിറന്നിരുന്നു എന്ന് നമുക്ക്‌ മനസ്സിലാക്കാം.ഇതിന്റെ ഉത്ഭവത്തെ കുറിച്ച്‌ പല കഥകളുമുണ്ട്‌.
കാലിഫോര്‍ണിയ കാര്‍ഷിക സര്‍വകലാശാലയിലെ പ്രമുഖ ജന്തു ശാസ്ത്രജ്ഞനായ ഡോ;വല്‍സന്‍ ഓച്ചന്തുരുത്ത്‌,തന്റെ ഭാര്യയുടെ, ഉത്തരധ്രുവത്തിലെവിടെയോ വച്ച്‌ കളഞ്ഞ്‌ പോയ മാല കണ്ടെടുക്കുന്നതിന്റെ ഭാഗമായ ദക്ഷിണധ്രുവത്തില്‍ നടത്തിയ കുഴിക്കലുകളില്‍,ആല്‍ത്തറ,തെങ്ങുമൂട്‌,പനച്ചുവട്‌ തുടങ്ങിയവയുടെ ചില ഫോസിലുകള്‍ കണ്ടെടുക്കുകയുണ്ടായി.അവയില്‍ നാര്‍ക്കോ അനാലിസിസ്‌ ടെസ്റ്റ്‌ നടത്തിയതിന്റെ ഭാഗമായി,അവ 12ആം നൂറ്റാണ്ടിന്റെ ആരംഭകാലങ്ങളില്‍ നിലവില്‍ ഉണ്ടായിരുന്നവ ആയിരുന്നെന്ന് തെളിഞ്ഞിട്ടുണ്ട്‌.'

'അണ്ണാ,ഈ ആല്‍ത്തറയും കലുങ്കും ഒക്കെയായി മലയാളം ബ്ലോഗിന്‌ എന്ത്‌ ബന്ധം.'

'കുഞ്ഞേ,മലയാളത്തില്‍ ബ്ലോഗുകള്‍ ഉണ്ടാകുന്നതിനും മുന്‍പേ ഇവിടെ മലയാളം ബ്ലോഗേഴ്സ്‌ ഉണ്ടായിരുന്നു.അതിനെക്കുറിച്ച്‌, മുട്ടയാണോ കോഴിയണോ സ്റ്റയിലില്‍ ഒരു പഠനവും നടന്നിട്ടുണ്ട്‌.അതിനെക്കുറിച്ച്‌ പിന്നീട്‌ പറയാം.
മലയാള ഭാഷയെ എങ്ങനെയെങ്കിലും ഒരു കരക്കെത്തിക്കണം,അല്ലേല്‍ ഒരരുക്കാക്കണം എന്ന സ്വപ്നം കണ്ട്‌ നടന്നിരുന്ന ചില അബോര്‍ജിനുകള്‍ സിന്ധൂനദീതട കാലഘട്ടത്തില്‍ ജീവിച്ചിരുന്നു.അവരുടെ ശല്യം സഹിക്കവയ്യാതെ ആയപ്പോള്‍,അക്കാലത്ത്‌ രാജ്യം ഭരിച്ചിരുന്ന സിന്ധുവിന്റെ അമ്മ മറിയ,അബോര്‍ജിനുകളെ ആക്രമിക്കുകയും അവരില്‍ ചിലരെ പിടിച്ച്‌ കെട്ടുകയും ഒരു പായക്കപ്പലില്‍ കയറ്റി അമേരിക്കയിലേക്ക്‌ നാടുകടത്തുകയും ചെയ്തു. പിടിയില്‍ അകപ്പെടാതിരുന്ന ചിലര്‍ ഗാന്ധാരം,മെക്ക മെദീന വഴി അറബ്‌ ദേശത്ത്‌ എത്തുകയും ചെയ്തു.മറ്റു ചിലര്‍ സില്‍ക്ക്‌ റൂട്ട്‌ വഴി ഹിമാലയം കടന്ന് ചൈനയില്‍ എത്തുകയും,അവിടുന്ന് കിഴക്കന്‍ പ്രദേശങ്ങളായ പാറ്റയേയും പാമ്പിനേയും തിന്നുന്നവരുടെ നാട്ടില്‍ എത്തുകയും ചെയ്തു.'

'അതെന്തരണ്ണാ,മറിയ പിടിച്ച്‌ കെട്ടിയവരെ അമേരിക്കയിലേക്ക്‌ അയച്ചത്‌.'

'കുഞ്ഞേ,കൊളംബസിന്‌ താന്‍ കണ്ടെത്തിയ ഭാഗം ഭാരതമല്ലായെന്നും ഒരു പോക്കണം കെട്ട പ്രദേശമാണെന്നും മനസ്സിലായപ്പോള്‍,അതിന്റെ വിഷമം തീര്‍ക്കാന്‍ അടിച്ച്‌ പൂക്കുറ്റിയായി തന്റെ ഭാര്യയായ മേരിയെ തെറി പറഞ്ഞതില്‍ നിന്നുമാണ്‌ ആ പ്രദേശത്തിന്‌ അമേരിക്ക എന്ന പേര്‌ ലഭിച്ചത്‌.
ഏയ്‌ മേരീ ക്യാ ഹേ,യേ ക്യാഹേ മേരീ,മേരീ ക്യാ,ക്യാമേരീ തുടങ്ങിയ രീതിയില്‍ കരഞ്ഞ്‌ കരഞ്ഞ്‌ അമേരിക്ക എന്ന പേര്‌ ലഭിച്ച, മാനും മാഞ്ചാടിയുമില്ലാത്ത നാട്ടില്‍ നിന്നും ഭാരതത്തിലേക്ക്‌ കൊളംബസ്‌ നീങ്ങാന്‍ സാധ്യതയുണ്ടെന്ന ഒരു വാര്‍ത്ത മറിയയുടെ ചെവിയില്‍ എത്തിയിരുന്നു.ആ നീക്കം തടയുന്നതിന്റെ ഭാഗമായിട്ട്‌ കൂടിയാണ്‌ തന്ത്രശാലിയായ മറിയ,പിടിച്ച്‌ കെട്ടിയവരെ അങ്ങോട്ട്‌ തന്നെ അയച്ചത്‌.ഭാരതത്തില്‍ നിന്ന് വന്ന കുറച്ച്‌ പേര്‍ തന്നെ ഈ സൈസ്‌ മുറ്റ്‌ ഇനം ആണെങ്കില്‍ ബാക്കിയുള്ളവര്‍ എന്തായിരിക്കും എന്ന് ഭയന്ന് കൊളംബസ്‌ തിരിച്ച്‌ പൊയ്ക്കൊള്ളും എന്നായിരുന്നു മറിയയുടെ ചിന്ത.
അങ്ങനെ പലവഴിക്കായ അബോര്‍ജിനുകള്‍ മാതൃഭാഷയെ ഉദ്ധരിക്കാന്‍ പലനാട്ടിലിരുന്ന് നടത്തിയ നീക്കങ്ങളുടെ ശ്രമമായി ഉരുത്തിരിഞ്ഞ ഒരു ആദ്യ കാല സമൂഹമാണ്‌ ആല്‍ത്തറ,കലുങ്ക്‌,പനച്ചുവട്‌,തെങ്ങും മൂട്‌ എന്നൊക്കെ അറിയപ്പെടുന്നത്‌.ആ കാലഘട്ടത്തില്‍ വ്യക്തമായ ഒരു എഴുത്ത്‌ രൂപം അബോര്‍ജിനുകള്‍ക്ക്‌ ഇല്ലായിരുന്നു.വാമൊഴി തന്നെ ശരണം.'ടോ ഗോപാലകൃഷ്ണാ' രീതിയിലുള്ള വാമൊഴി ഭാഷ യഥേഷ്ടം ഉപയോഗിച്ചിരുന്ന അവര്‍ക്ക്‌ ഒരു വരമൊഴി ഒരുക്കിക്കൊടുക്കുന്നതില്‍ ഒരു അമേരിക്കന്‍ അബോര്‍ജിന്‍ വിജയിക്കുകയുണ്ടായി.തുടര്‍ന്ന് ആ വരമൊഴിയില്‍ കുത്തിക്കുറിക്കലും കത്തിക്കുത്തും ആരംഭിച്ചു.അതാണ്‌ മലയാളം ബ്ലോഗിന്റെ തുടക്കം.'

'അണ്ണാ,അണ്ണനിപ്പഴും മലയാളംബ്ലോഗിലെ നിലവിലെ പ്രശ്നങ്ങള്‍ എന്താണെന്ന് പറഞ്ഞില്ല.'

'പറയാമെടാ പറയാം,നീ ക്ഷമിക്ക്‌.ഞാന്‍ അങ്ങോട്ട്‌ തന്നെയാണ്‌ വരുന്നത്‌.
മറിയ, അബോര്‍ജിനുകളെയെല്ലാം തുരത്തിയോടിച്ചതിന്‌ ശേഷം മകള്‍ സിന്ധു,ഹാരപ്പയെ കല്യാണം കഴിക്കുകയും,അവര്‍ക്ക്‌ ആര്യനെന്നും ദ്രാവിഡനെന്നും പേരുള്ള രണ്ട്‌ കുട്ടികള്‍ ഉണ്ടാവുകയും ചെയ്തു.അബോര്‍ജിനുകളും സിന്ധുവുമായി അവിഹിതം വല്ലതും ഉണ്ടായിരുന്നോ എന്നൊന്നും എനിക്കറിഞ്ഞ്‌ കൂടാ,എന്തായാലും ആര്യനിലും ദ്രാവിഡനിലും ബ്ലോഗിങ്ങിന്റെ ജീനുകള്‍ ഉണ്ടായിരുന്നു.അല്ലെങ്കില്‍ അവര്‍ അടിച്ച്‌ പിരിയില്ലല്ലോ.ആര്യനുമായി ഉടക്കിയ ദ്രാവിഡന്‍,തെക്കന്‍ ഭാരതത്തിലേക്ക്‌ പോന്നു.തുടര്‍ന്ന് പലനാടുകളിലായി പരന്ന് കിടക്കുന്ന അബോര്‍ജിനുകളുടെ വരമൊഴി ഭാഷ സായത്തമാക്കുകയും പ്രയോഗത്തില്‍ വരുത്തുകയും ചെയ്തു.
പക്ഷേ ആ കാലഘട്ടത്തില്‍,അതായത്‌ മലയാളം ബ്ലോഗിന്റെ ആദ്യകാലങ്ങളില്‍ ഭേദപ്പെട്ട കൃതികളൊന്നും ബ്ലോഗില്‍ പോസ്റ്റ്‌ ചെയ്യപ്പെട്ടിരുന്നില്ല.അതിന്‌ ഒരു കാരണവും ഉണ്ട്‌.ഭാഷയോട്‌ സ്നേഹം ഉണ്ടായിട്ട്‌ മാത്രം കാര്യമില്ല.അതില്‍ ക്രിയാത്മകമായി വല്ലതും എഴുതണമെങ്കില്‍ മൂള വേണം.പക്ഷേ ഭൂരിഭാഗവും വിവരസാങ്കേതിക മേഖലയില്‍ പ്രവര്‍ത്തിക്കുന്നവരായത്‌ കൊണ്ട്‌ ഭാഷാസ്നേഹം ഉണ്ടെങ്കിലും ഭാഷാജ്ഞാനവും ക്രിയാത്മകതയും കമ്മിയായിരുന്നു.
അത്‌ കൊണ്ട്‌ തന്നെ,
'ആനയിടുന്നത്‌ പിണ്ടം
ആടിടുന്ന കാട്ടം
പശുവിടുന്നത്‌ ചാണകം'
തുടങ്ങിയ രീതിയിലുള്ള കവിത/കഥ/ലേഖനങ്ങള്‍ എഴുതുന്നവര്‍ വലിയ എഴുത്തുകാരായി പരിഗണിക്കപ്പെട്ടു.കമന്റ്‌ ഓപ്ഷന്‍ ഉള്ളത്‌ കൊണ്ട്‌ പ്രോത്സാഹനവും ലഭിച്ചു.അംഗസംഖ്യ ആദ്യകാലങ്ങളില്‍ കുറവായത്‌ കൊണ്ട്‌ എല്ലാവരും എല്ലാവരുടേയും പോസ്റ്റുകള്‍ വായിച്ചു,അഥവാ സഹിച്ചു.അങ്ങനെ ചിലര്‍ മൂക്കില്ലാരാജ്യത്തെ മുറിമൂക്കന്മാരായി വിലസി.'

'അണ്ണാ,അക്കാലത്ത്‌ ബ്ലോഗില്‍ കണ്ടെയിനര്‍ കണക്കിന്‌ സ്നേഹം ഉല്‍പ്പാദിപ്പിച്ചിരുന്നു എന്നും,നമ്മുടെ ആവശ്യത്തിന്‌ സ്നേഹം ഉപയോഗിച്ചിട്ടും ബാക്കി വന്നൂയെന്നും, ബാക്കിവന്നത്‌ കയറ്റി അയച്ച്‌ വിദേശ നാണ്യം സമ്പാദിച്ചിരുന്നൂയെന്നും,ഐക്യത്തിന്റെ പേറ്റന്റ്‌ മലയാളം ബ്ലോഗിനായിരുന്നു എന്നുമൊക്കെ കേള്‍ക്കുന്നു.ശരിയാണോ അണ്ണാ.'

'കുഞ്ഞേ,നാലും മൂന്നും ഏഴ്‌ പേരുണ്ടായിരുന്ന കാലത്ത്‌,എല്ലാവര്‍ക്കും എല്ലാവരേയും അറിയാമായിരുന്നു.അത്‌ സ്വാഭാവികമല്ലേ.ആരുടെയെങ്കിലും ഒരു പോസ്റ്റ്‌ വന്നാല്‍ എല്ലാവരും വായിക്കുകയും ചെയ്യുമായിരുന്നു.കാരണം പോസ്റ്റുകളും എണ്ണത്തില്‍ കുറവ്‌.അടുക്കള തിണ്ണയിലിരുന്ന് കുശുമ്പും കുന്നായ്മയും പറയുന്ന ചേടത്തിമാരുടെ സംസാരരീതിയില്‍ കമന്റുകളും.അപ്പോള്‍ ഐക്യവും സ്നേഹവും തോന്നുക സ്വാഭാവികമാണ്‌.'

'പിന്നെ എപ്പഴണ്ണാ ഇതിനൊരു ഇടര്‍ച്ചയുണ്ടായത്‌.'

'കുഞ്ഞേ,പതിനാറാം നൂറ്റാണ്ടിന്റെ അവസാന കാലത്തോട്‌ കൂടി ബ്ലോഗില്‍ നര്‍മ്മത്തിന്‌ പ്രാധാന്യം ലഭിച്ച്‌ തുടങ്ങി.ആനപ്പിണ്ടം മോഡല്‍ കവിത/കഥകളില്‍ നിന്നും വ്യത്യസ്ഥമായി കുറച്ച്‌ നര്‍മ്മം ബ്ലോഗില്‍ നിന്നും വായിക്കാന്‍ പറ്റും എന്നറിഞ്ഞ്‌ വായനക്കാര്‍ വര്‍ദ്ധിച്ചു.
അങ്ങനെ വായനക്കാരായി വന്നവരില്‍ ചിലര്‍ ഭാഷയെ സ്നേഹിച്ചവര്‍ മാത്രമല്ല,ഭാഷ കൈകാര്യം ചെയ്യാന്‍ അറിയാവുന്നവരും കൂടിയായിരുന്നു.പതിനെട്ടാം നൂറ്റാണ്ടിന്റെ അവസാന കാലം ആയപ്പോഴേക്കും അവരിലെ കവികളും കഥാകൃത്തുകളും ഉണന്നു.നേരത്തേ തന്നെ ഉണര്‍ന്നിരുന്നവര്‍ ഇരിക്കാന്‍ ഒരു സൈബര്‍ സീറ്റ്‌ കിട്ടിയപ്പോള്‍ ചാടിക്കേറി ഇരുന്നു.
കഥകളായി,കവിതകളായി,ലേഖനങ്ങളായി,അങ്ങനെ നല്ല നല്ല കൃതികള്‍ ബ്ലോഗില്‍ ഉണ്ടാവാന്‍ തുടങ്ങി.അവര്‍ക്കും അവരുടെ കൃതികള്‍ക്കും ആരാധകരും ഉണ്ടായി.അപ്പോള്‍ എന്ത്‌ സംഭവിച്ചു,ആദ്യകാല മുറിമൂക്കന്‍ രാജക്കന്മാര്‍ക്ക്‌ ഇരിക്കപ്പൊറുതി ഇല്ലാതായി.അവരില്‍ അസൂയ,കുശുമ്പ്‌ തുടങ്ങിയ രോഗങ്ങള്‍ കാണപ്പെട്ടു തുടങ്ങി.അനോണികളെ എങ്ങനെ വളരെ ശാസ്ത്രീയമായി ഉപയോഗിക്കാന്‍ പറ്റുമെന്ന് മുറിമൂക്കന്മാര്‍ കമന്റുകളിലൂടെ കാണിച്ച്‌ കൊടുത്തു.
അങ്ങനെ ബ്ലോഗിലെ ആദ്യ സ്പര്‍ദ്ധ ഉടലെടുത്തു.'

'അണ്ണാ,അപ്പോള്‍ പഴയ ബ്ലോഗേഴ്സും പുതിയ ബ്ലോഗേഴ്സും തമ്മിലുള്ള ഈഗോക്ലാഷ്‌ മാത്രമാണോ ഇവിടെ പ്രശ്നം.ലോബിയിംഗ്‌ ഒരു പ്രശ്നമല്ലേ.'

'കുഞ്ഞേ.തീര്‍ച്ചയായും.ലോബികള്‍ ഒരു പ്രശ്നം തന്നെയാണ്‌.പക്ഷേ ശ്രദ്ധിക്കേണ്ടതായ ഒരു കാര്യം എന്താണെന്ന് വച്ചാല്‍ ആദ്യമായി ഇവിടെ ലോബികള്‍ തിരിഞ്ഞത്‌ വര്‍ഗ്ഗീയമായോ,ലിംഗഭേദം വച്ചോ,പ്രായഭേദം വച്ചോ അല്ല.പ്രാദേശികത്വം വച്ചാണ്‌.
അമേരിക്കന്‍ ലോബി,ഗള്‍ഫ്‌ ലോബി,കേരളാ ലോബി അങ്ങനെ വേര്‍തിരിവുകള്‍ ഉണ്ടായി.ആദ്യകാലങ്ങളില്‍ കര്‍ട്ടന്‌ പിന്നില്‍ മറഞ്ഞ്‌ നിന്നിരുന്ന ലോബി പ്രഭാമയം പത്തൊമ്പതാം നൂറ്റാണ്ടിന്റെ അവസാന കാലം ആയപ്പോഴേക്കും കര്‍ട്ടന്‍ പൊക്കിമാറ്റി വെളിയില്‍ വന്ന് തുടങ്ങി.
ലോബികളിലെ ഒരു പ്രധാന ലോബിയായ ഗല്‍ഫ്‌ ലോബി,യു.എ.യി കേന്ദ്രീകരിച്ചാണ്‌ പ്രവര്‍ത്തിക്കുന്നത്‌.കുവൈയിറ്റ്‌,സൗദി,ഒമാന്‍,ബഹറിന്‍,തുടങ്ങിയ പ്രദേശങ്ങളിലും ബ്ലോഗേഴ്സ്‌ ഉണ്ടെങ്കിലും ഗള്‍ഫ്‌ ലോബി പൊതുവേ യു.എ.യി കേന്ദ്രീകരിച്ചാണ്‌ പ്രവര്‍ത്തിക്കുന്നത്‌.വലിയ ശല്യമൊന്നുമില്ലാത്ത ലോബിയിംഗ്‌ ആണ്‌ അവരുടേത്‌.കുറച്ച്‌ കൂടി വ്യക്തമായി പറഞ്ഞാല്‍ ബ്ലോഗില്‍ അനാവശ്യമായ ഇടപെടല്‍ അവരുടെ ഭാഗത്ത്‌ നിന്ന് ഉണ്ടായിട്ടില്ല.ഒറ്റപ്പെട്ട വല്ല സംഭവങ്ങള്‍ ഉണ്ടോ എന്നുള്ളത്‌ എന്റെ ശ്രദ്ധയില്‍ പെട്ടിട്ടുമില്ല.'

'അണ്ണാ,അപ്പോള്‍ മറ്റ്‌ ലോബികളോ.'

'കുഞ്ഞേ,പിന്നെയുള്ള ഒരു പ്രധാന ലോബി,കേരളാ ലോബിയാണ്‌.അത്‌ കൊച്ചി കേന്ദ്രീകരിച്ചാണ്‌ പ്രധാന പ്രവര്‍ത്തനം നടത്തുന്നത്‌.കേരളത്തില്‍ തെക്കും വടക്കും കിടക്കുന്നവര്‍ക്ക്‌ എത്തിച്ചേരാന്‍ എളുപ്പത്തില്‍ കൊച്ചി ഒരു കേന്ദ്രം ആവുകയായിരുന്നു. ഈയിടക്ക്‌ നടത്തിയ ചില നിര്‍ണ്ണായക നീക്കങ്ങളിലുടെ തങ്ങള്‍ ഒരു പ്രബലശക്തിയാണെന്ന് കേരളാ ലോബി തെളിയിച്ച്‌ കഴിഞ്ഞു.
പിന്നെയുള്ളത്‌ ബാംഗ്ലൂര്‍ ലോബിയും ചെന്നൈ ലോബിയുമാണ്‌.ഇവര്‍ കേരളാ ലോബിയുമായി വളരെ അടുപ്പത്തിലുമാണ്‌.'

"അണ്ണാ അണ്ണനപ്പോ ഏത്‌ ലോബിയാണണ്ണാ.'

'കുഞ്ഞേ,ഞാന്‍ സ്വയമേ ഒരു ലോബിയാണ്‌.
ശ്രീലങ്ക,മാലിദ്വീപ്‌,ലക്ഷദ്വീപ്‌ തുടങ്ങിയ ലോബികളെ നയിക്കുന്നത്‌ ഞാനാണ്‌.മാലിദ്വീപിലെ പ്രമുഖ ബ്ലോഗറായ മറിയം റഷീദയെ ഞാന്‍ ഈയിടെ ട്രിങ്കോമാലിയില്‍
വച്ച്‌ പരിചയപ്പെടുകയുണ്ടായി.അവരുടെ രസകരമായ കേരളാ അനുഭവങ്ങള്‍ ബ്ലോഗിലൂടെ വിവരിച്ചത്‌ ഒരു വന്‍ ഹിറ്റായിരുന്നു.അത്‌ സിനിമയാക്കുന്നതിന്‌ എസ്‌.എ.ജാന്‍,കെ.എസ്‌.ഗോപാലകൃഷ്ണന്‍ സാര്‍ തുടങ്ങിയ വമ്പന്‍ സംവിധായകര്‍ അവരെ സമീപിച്ചിട്ടുണ്ട്‌.മറിയത്തിന്റെ നായകന്‍ ഞാന്‍ ആയിരിക്കും.'

'അണ്ണാ,അണ്ണന്‍ മറ്റേ ലോബീടെ കാര്യം പറഞ്ഞില്ല.'

'ഏത്‌ കുഞ്ഞേ.'

'അണ്ണാ,അമേരിക്കന്‍ ലോബി.'

'ഹോ,അവന്റെയൊരു ആക്രാന്തം കണ്ടില്ലേ.പറയാമെടാ പറയാം.
വളരെയധികം ദുഷ്‌ പേര്‌ കേട്ടിട്ടുള്ള ഒരു ലോബിയാണ്‌ അമേരിക്കന്‍ ലോബി.മലയാളം ബ്ലോഗിന്‌ വളരെയധികം ടെക്ക്നിക്കല്‍ സംഭാവന നല്‍കിയ ആ ലോബി,എന്ത്‌ കൊണ്ട്‌ നമ്മുടെ മുഖ്യമന്ത്രി മലയാള ഭാഷക്ക്‌ നല്‍കിയ പുതിയ ഹൈലൈറ്റട്‌ പദമായ 'വെറുക്കപ്പെട്ടവര്‍' ഒപ്പം പേറുന്നു എന്ന് ചിന്തിക്കണം.
അവരില്‍ ഒരു വ്യക്തി പിന്മൊഴി സംവിധാനം കൊണ്ട്‌ നടന്നവരില്‍ പ്രമുഖനാണ്‌.പിന്മൊഴി സര്‍വര്‍ ഓടിക്കാന്‍ വേറെ പലരും കൂട്ടിനുണ്ടായിരുന്നെങ്കിലും അമേരിക്കയില്‍ സര്‍വര്‍ ഓടിച്ചിരുന്ന ആ വ്യക്തി മാത്രമാണ്‌ പഴി കേട്ട്‌ കൊണ്ടിരുന്നത്‌.പിന്മൊഴി സംവിധാനത്തിലെ ചിട്ടവട്ടങ്ങളെ എതിര്‍ത്തിരുന്ന,അല്ലെങ്കില്‍ അനുസരിക്കാന്‍ തയ്യാറാവാതിരുന്ന ചില വിപ്ലവ ബ്ലോഗേഴ്സ്‌ ഏറ്റുമുട്ടലിന്റെ പാത സ്വീകരിച്ചപ്പോള്‍,പിന്മൊഴി നടത്തിപ്പുകാരനെ പിന്തുണക്കാന്‍ എത്തിയ ചില കാല്‌ നക്കികളാണ്‌ പ്രശ്നം കൂടുതല്‍ വഷളാക്കിയത്‌.നടത്തിപ്പുകാരനെ സുഖിപ്പിച്ചാല്‍ എന്തൊക്കെയോ ആനുകൂല്യം ലഭിക്കും, അല്ലേല്‍ ഞാന്‍ നടത്തിപ്പുകാരന്റെ സ്വന്തം ആളാണ്‌ എന്ന് നാട്ടുകാരെ അറിയിക്കാന്‍ വെമ്പല്‍ പൂണ്ട ചില നപുംസകങ്ങള്‍ ആണ്‌ പ്രശ്നത്തില്‍ പെട്രോള്‍ കോരി ഒഴിച്ചത്‌.
ആ കാല്‌ നക്കികളില്‍ തന്നെയുള്ള മറ്റൊരു പ്രമാണിയാണ്‌ ബ്ലോഗില്‍ അടുത്തിടെ ലിംഗഭേദം കൊണ്ടൊരു കളി കളിച്ചത്‌.വിവാദങ്ങള്‍ ഉണ്ടാക്കുക മാത്രമാണ്‌ ആ ബ്ലോഗിന്റെ ലക്ഷ്യം.അതിലൂടെ കിട്ടുന്ന ചീപ്‌ പബ്ലിസിറ്റി.ക്രിയാത്മകമായി ഒന്നും ചെയ്യാന്‍ പറ്റാത്തവര്‍ക്ക്‌ പറ്റിയ പണി.കോമ്പ്ലക്സിന്റെ കൂത്തരങ്ങാണ്‌ ആ ബ്ലോഗ്‌.
കഴിഞ്ഞ ദിവസങ്ങളില്‍ ഗള്‍ഫ്‌ ബ്ലോഗേഴ്സിനെ മൊത്തത്തില്‍ കടന്നാക്രമിക്കുക വഴി പബ്ലിസിറ്റിക്ക്‌ വേണ്ടി എന്ത്‌ തൂക്ക്‌ കട്ടയും അവര്‍ ചുമക്കും എന്ന് എല്ലാവര്‍ക്കും മനസ്സിലായി.
നല്ല ഫോട്ടോ ഗ്രാഫേഴ്സ്‌,നല്ല ഇമ്പമാര്‍ന്ന ലളിത ഗാനങ്ങള്‍ എഴുതുന്നവര്‍,നല്ല കഥകള്‍ എഴുതുന്നവര്‍,ടെക്ക്നിക്കലായ എന്ത്‌ സഹായവും ബ്ലോഗേഴ്സിന്‌ നല്‍കാനായി സദാ തയ്യാറായി നില്‍ക്കുന്നവര്‍, അങ്ങനെ അങ്ങനെ എത്ര നല്ല ബ്ലോഗേഴ്സാണ്‌ അമേരിക്കയില്‍ ഉള്ളത്‌.എല്ലാവരുടേയും പേര്‌ ചീത്തയാക്കാന്‍ ഒറ്റ ബ്ലോഗര്‍ മതി.
അതായത്‌ 'നഞ്ചെന്തിനാ അഞ്ച്‌ കിലോ'.
ഇത്‌ എല്ലാവരും മനസ്സിലാക്കണം.മനസ്സിലാക്കി പ്രവര്‍ത്തിക്കണം.

'അണ്ണാ,അണ്ണനും ഇത്‌ തന്നെയല്ലേ ചെയ്യുന്നത്‌.പബ്ലിസിറ്റിക്ക്‌ വേണ്ടിയുള്ള ഈ പുലഭ്യം പറച്ചില്‍.'

'ടാ പുല്ലേ,എഴീച്ച്‌ പോടാ.'


ഗുണപാഠകഥ;

പത്തൊമ്പതാം നൂറ്റാണ്ടിന്റെ അവസാനകാലത്ത്‌ മധ്യകേരളത്തിലെ കിഴക്കന്‍ മലയോരപ്രദേശങ്ങളിലൊന്നില്‍ ഒരു നോവലിസ്റ്റ്‌ ജീവിച്ചിരുന്നു.അദ്ദേഹം എഴുതിയെഴുതി നാട്ടുകാരെ മാക്സിമം വെറുപ്പിച്ചു.
കരയുന്ന കുട്ടികളെ നോവലിസ്റ്റിന്റെ കൃതികള്‍ വായിച്ച്‌ കേള്‍പ്പിക്കും എന്ന് പറഞ്ഞ്‌ ഭയപ്പെടുത്തിയാണ്‌ അമ്മമാര്‍ നിയന്ത്രിച്ചിരുന്നത്‌.
സര്‍ക്കാര്‍,തങ്ങളുടെ ശിക്ഷാ സംവിധാനത്തില്‍ നിന്നും തൂക്കുകയര്‍ ഒഴിവാക്കി.പകരം പ്രതിയെ 24 മണിക്കൂറും നോവലിസ്റ്റിന്റെ കൃതികള്‍ വായിച്ച്‌ കേള്‍പ്പിക്കാന്‍ ഉത്തരവായി.
യുദ്ധവേളകളില്‍ സൈനികര്‍ അതിര്‍ത്തികളില്‍ മൈനിന്‌ പകരം ഇദ്ദേഹത്തിന്റെ കൃതികള്‍ വിതറി.

ഈ നോവലിസ്റ്റിന്‌ നാല്‌ മക്കളായിരുന്നു.അവരെ നാലുപേരേയും തന്റെ വഴിയിലൂടെ തന്നെ വളര്‍ത്തണമെന്ന് നോവലിസ്റ്റ്‌ ആഗ്രഹിച്ചു.

ബുദ്ധിജീവി ആയിരുന്നു ആദ്യ മകന്‍.അഛന്റെ ആഗ്രഹം പോലെ തന്നെ നാട്ടുകാരാല്‍ വെറുക്കപ്പെട്ട്‌ അയാള്‍ ജീവിച്ചു.
യഥാക്രമം കവിയും കഥാകാരനുമായിരുന്നു രണ്ടും മൂന്നും മക്കള്‍.അവരും അഛന്റെ ആഗ്രഹം പോലെ തന്നെ പെരുവഴിയിലെത്തി.
പക്ഷേ നാലാമത്തേത്‌ പെണ്ണായിരുന്നു.എട്ടാം ക്ലാസില്‍ മൂന്ന് കൊല്ലം തോറ്റപ്പോള്‍ അവള്‍ പഠിപ്പ്‌ നിര്‍ത്തി.സാറിന്‌ പ്രേമലേഖനം കൂടി കൊടുത്തപ്പോള്‍ പൂര്‍ത്തിയായി.
തൊഴിലൊന്നുമില്ലാതെ,പഠിക്കാന്‍ പോകാതെ അവള്‍ വീട്ടിലിരുന്ന് ചൊറികുത്തി.ഇടക്ക്‌ കാച്ചില്‍,ചേമ്പ്‌,ചേന,കടച്ചക്ക തുടങ്ങിയവ പുഴുങ്ങി മറ്റാര്‍ക്കും കൊടുക്കാതെ അവള്‍ തിന്നു.
നോവലിസ്റ്റ്‌ സഹികെട്ടു.മകള്‍ക്ക്‌ വല്ല പെട്ടിക്കടയും ഇട്ട്‌ കൊടുക്കാമെന്ന് വച്ചാല്‍ അവള്‍ നാരങ്ങാമുട്ടായിയുടെ പേരില്‍ നാട്ടുകാരുമായി ഇടിയുണ്ടാക്കും.തയ്യല്‍ ക്ലാസില്‍ ചേര്‍ത്താല്‍ അടുത്തിരിക്കുന്നവളെ സൂചിക്ക്‌ കുത്തും.നോവലിസ്റ്റ്‌ ധര്‍മ്മസങ്കടത്തിലായി.നാട്ടുകാരെ ഉപദ്രവിക്കാനുള്ള വാസന അവളിലുണ്ട്‌.പക്ഷേ വിദ്യാഭ്യാസത്തിന്റെ പ്രശ്നം കാരണം ഒന്നും അങ്ങോട്ട്‌ ഏല്‍ക്കുന്നില്ല.എഴുത്തും വായനയും അറിയാമായിരുന്നെങ്കില്‍ അവളുടെ സ്വഭാവം വച്ച്‌ അവള്‍ തന്നേക്കാള്‍ പേര്‌ കേള്‍പ്പിച്ചേനേ.

അവസാനം നോവലിസ്റ്റ്‌ ഒരു വഴി കണ്ടുപിടിച്ചു.

മകളെ ബ്ലോഗിംഗ്‌ പഠിപ്പിച്ചു.എന്നിട്ട്‌ അമേരിക്കയിലേക്ക്‌ കെട്ടിച്ച്‌ വിട്ടു.

ശേഷം ചിന്തനീയം.

-ശുഭം-

Friday, July 6, 2007

ഞാനും മറുമൊഴിയിലേക്ക്

അങ്ങനെ അതും സംഭവിച്ചു.
പിന്മൊഴി പ്രവര്‍ത്തനം അവസാനിപ്പിച്ചു.
ഇനി അത്‌ പുനര്‍ജനിച്ച്‌ സ്വന്തക്കാര്‍ക്കും ബന്ധക്കാര്‍ക്കും വേണ്ടി മാത്രം സര്‍വീസ്‌ നടത്തുമോ എന്നൊന്നുമറിയില്ല.
എന്തായാലും സംഗതി നിലച്ചു എന്ന് മാത്രമറിയാം.
വേറൊരു സര്‍വീസ്‌ വന്നത്‌ കൊണ്ട്‌,മത്സരം നടന്നാല്‍ പരാജയപ്പെട്ട്‌ പോകും എന്നുള്ള പേടി മൂലമാണ്‌ പിന്മൊഴി സര്‍വീസ്‌ നിര്‍ത്തിയത്‌ എന്ന് കേള്‍ക്കുന്നുണ്ട്‌.
ശരിയാണോ തെറ്റാണൊ എന്ന് കര്‍ത്താവിനോട്‌ ചോദിച്ചാല്‍ അറിയാം.
[ഡോ:കര്‍ത്താവ്‌ പേരുകേട്ട ജോത്സ്യനാണ്‌.പാട്ടുകാരി ജ്യോത്സനയല്ലാ,വെറും ജോത്സ്യന്‍]

പിന്മൊഴി നടത്തിപ്പുകാര്‍ക്ക്‌ എന്തെങ്കിലും അസൗകര്യം ഉണ്ടായത്‌ കൊണ്ട്‌ അവര്‍ സര്‍വീസ്‌ അവസാനിപ്പിച്ചു എന്ന് വിശ്വസിക്കാന്‍ ആണ്‌ എനിക്കിഷ്ടം.
പക്ഷേ അതങ്ങനയല്ലാ, വ്യക്തമായ ഗ്രൂപ്പ്‌ കളിയുടെ ഭാഗമായിരുന്നു എന്ന് ചില സമീപകാല സംഭവങ്ങള്‍ തെളിയിക്കുന്നില്ലേ എന്ന് ചോദിച്ചാല്‍ അതും കര്‍ത്താവിനോട്‌ ചോദിക്കേണ്ടി വരും.


പിന്മൊഴി നിര്‍ത്തിയതിന്‌ ശേഷം വന്ന മറുമൊഴിയില്‍, പിന്മൊഴിയുടെ സേവനം നമുക്ക്‌ തന്ന വ്യക്തികളും അവരെ പിന്തുണച്ച്‌ കൊണ്ട്‌ ഏത്‌ പാതിരാത്രിക്കും പുറം മാന്താന്‍ വന്നിരുന്ന ചിലര്‍ എന്ത്‌ കൊണ്ട്‌ അംഗങ്ങള്‍ ആകുന്നില്ല.
നാഴികക്ക്‌ നാല്‍പ്പത്‌ വട്ടം ഒറ്റക്കെട്ടായി നമുക്ക്‌ പടവാളേന്താം എന്നും പറഞ്ഞ്‌ തെക്കുവടക്ക്‌ നടന്നിരുന്ന പലരേയും കാണുന്നില്ല.
പിന്മൊഴി നിലവില്‍ ഇല്ലാത്ത സ്ഥിതിക്ക്‌ മറുമൊഴിയില്‍ ഒറ്റക്കെട്ടിന്റെ ആള്‍ക്കാര്‍ ചേക്കേറേണ്ടതായിരുന്നില്ലേ.
അപ്പോള്‍ മനസ്സിലാക്കേണ്ടത്‌ ഒറ്റക്കെട്ടിന്റെ ആള്‍ക്കാര്‍ വിചാരിച്ചിട്ട്‌ മതി ഇവിടെ ഒറ്റക്കെട്ട്‌,
എന്നും പറഞ്ഞ്‌ പഴയ പ്രതാപത്തിന്റെ അസ്ഥിവാരത്തില്‍ വലത്തെകൈകൊണ്ട്‌ മാന്തി,
ചൊറിയുന്ന പുണ്ണില്‍ ഇടത്തേക്കൈകൊണ്ടും മാന്തി ചുമ്മാ മാനത്തും നോക്കി ഇരിക്കുവാണെന്ന് തന്നെ കരുതാം.

പഴയകാലത്ത്‌ സര്‍വീസ്‌ നടത്തിയിരുന്ന വണ്ടി കട്ടപ്പുറത്ത്‌ കേറ്റി.
അത്‌ കാരണം പുതിയ ബസ്സ്‌ ഓടിത്തുടങ്ങി.പ
ഴയ ബസ്സ്‌ കട്ടപ്പുറം ആയേക്കും എന്ന് ചില ത്രികാല ജ്നാനികള്‍ മുന്‍ കൂട്ടിയറിഞ്ഞ്‌ ഓടുന്ന പട്ടിക്ക്‌ ഒരുമുഴം മുന്‍പേ ഒരു കീറ്‌ കൊടുത്തതാണെന്ന് പറഞ്ഞ്‌ കേള്‍ക്കുന്നുണ്ട്‌.
അതും കര്‍ത്താവിനറിയാം.
എന്നാല്‍ പുതിയ ബസ്സില്‍ പല പഴയ കാര്‍ന്നോമ്മാരും കേറാന്‍ ഇഷ്ടപ്പെടുന്നില്ല.
കാരണം എന്താന്ന് ചോദിച്ചാല്‍,നിസ്സാരമായിട്ട്‌ ഉത്തരം പറയാം.
'ഈഗോ'.
ഈഗോ അല്ലാതെ മറ്റൊന്നുമല്ലാ ഇതിന്റെ പിന്നില്‍.

പിന്മൊഴി കാരണം തമ്മില്‍ തല്ലും തൊഴുത്തില്‍ കുത്തും കൂടുന്നു,താന്‍ ഇടുന്ന കമന്റുകളൊരു പരസ്യബോര്‍ഡില്‍ പ്രദര്‍ശിപ്പിക്കും എന്നറിഞ്ഞ്‌ കൊണ്ട്‌ മനപ്പൂര്‍വം തൊഴുത്തിലിട്ട്‌ കുത്തുന്നതാണ്‌ എന്നും പറഞ്ഞ്‌ കേട്ടു.
എന്നാല്‍ പഴയ ബ്ലോഗേര്‍സ്‌ എന്ന് അവകാശപ്പെട്ട്‌ ചിലര്‍ നടത്തുന്ന കുത്സിതപ്രവൃത്തികളെ മറ്റുചിലര്‍ എതിര്‍ത്തപ്പോഴാണ്‌ ,
അയ്യോ എന്നെ തൊഴുത്തിലിട്ട്‌ കുത്തുന്നേ എന്ന് ചിലര്‍ കരഞ്ഞത്‌ എന്നും പറഞ്ഞ്‌ കേള്‍ക്കുന്നു.
മലയാളത്തില്‍ ബ്ലോഗിംഗ്‌ തുടങ്ങിയ കാലത്തേയുള്ള എത്രയോ ആളുകള്‍ ഉണ്ട്‌,
അവരുടെ കാര്യവും നോക്കി,പോസ്റ്റുകളും ഇട്ട്‌,മറ്റുള്ള പോസ്റ്റുകള്‍ കണ്ട്‌ കമന്റുകളും വച്ച്‌ പുതിയവര്‍ക്ക്‌ പ്രോത്സാഹനവും നല്‍കി കാര്യങ്ങള്‍ നീക്കുന്നവര്‍.
എന്നാല്‍ അവരൊന്നും, തന്നെ തൊഴുത്തിലിട്ട്‌ കുത്തിയേ എന്നും പറഞ്ഞ്‌ മോങ്ങി കേട്ടിട്ടില്ല.
ബ്ലോഗിംഗ്‌ എന്ന് പറഞ്ഞാല്‍ വല്ലപ്പോഴും എന്തെങ്കിലും സ്വന്തം താളില്‍ കുത്തിക്കുറിക്കണ്ടേ.
ഇത്‌ അത്‌ ചെയ്യൂല്ലാ എന്ന് മാത്രമല്ലാ,ബാക്കിയുള്ളവര്‍ എന്തെങ്കിലും ചെയ്യാന്‍ പോയാല്‍ കയ്യിട്ട്‌ വാരാനും വരും.
അടുപ്പിച്ചില്ലേല്‍ പിന്നെ നിന്നെ കാണിച്ച്‌ തരാമെടാ എന്നായി.
അതായത്‌ ഭീഷണി.
നിലത്ത്‌ നിന്നാലേ ഏത്‌ അമ്മാവനും വിലയുള്ളൂ എന്ന് മനസ്സിലായില്ലേ.
ഇനിയിപ്പോള്‍ ചിന്നിചിതറിയ സ്വന്തം മൂട്‌ താങ്ങികള്‍ കൂടിയുണ്ടാവൂല്ലാ ഒന്ന് താങ്ങാന്‍.
താങ്ങാന്‍ ആളില്ലേല്‍ ജീവിക്കാന്‍ പറ്റാത്ത ആളുകള്‍ ആണല്ലോ.

കുറച്ച്‌ നാള്‍ കൂടി എഴുതിയത്‌ ഇങ്ങനെ ആകേണ്ടി വന്നതില്‍ ശരിക്കും വിഷമം ഉണ്ട്‌.
എന്ത്‌ ചെയ്യാന്‍,വേറെ വഴിയില്ല.

ഈ പോസ്റ്റുമുതല്‍ ഞാനും മറുമൊഴിയിലേക്ക്‌.
എന്റെ കഴിഞ്ഞ പോസ്റ്റുകള്‍ പിന്മൊഴിയിലെത്തിച്ച്‌ എന്നെ സഹായിച്ച ഏവൂരാനോടും കൂട്ടരോടൂം ഒരു നന്ദി.
നിങ്ങള്‍ നാലഞ്ച്‌ പേര്‍ വളരെയധികം നല്ല സഹായമാണ്‌ എന്നോടും എഴുതാന്‍ തുടങ്ങുന്ന മറ്റു ബ്ലോഗേഴ്സിനോടും
ചെയ്തത്‌.
പക്ഷേ നിങ്ങളുടെ പ്രതിനിധി എന്ന മട്ടില്‍ ചിലയിടത്ത്‌ ചെന്ന് സംസാരിക്കുന്ന,
ഭീഷണിപ്പെടുത്തുന്ന മറ്റു ചിലരാണ്‌,
ചില കടല്‍കിഴവന്മാരാണ്‌ ഇവിടെ ഒരു പൊട്ടിത്തെറിക്ക്‌ കാരണഹേതു എന്ന് പച്ചയായിട്ട്‌ തന്നെ പറഞ്ഞിട്ട്‌ ഞാന്‍ അവസാനിപ്പിക്കുന്നു.

Tuesday, May 29, 2007

എങ്ങനെ പ്രശസ്തന്‍/പ്രശസ്തയാകാം

നമസ്കാരം സുഹൃത്തുക്കളേ,
എങ്ങനെ ഒരു ബുദ്ധിജീവിയാകാം എന്ന ക്ലാസ്‌ നിങ്ങള്‍ക്ക്‌ പലര്‍ക്കും പ്രയോജനപ്പെട്ട്‌ കാണുമെന്ന് വിശ്വസിക്കുന്നു.
പ്രയോജനം ലഭിച്ചവര്‍ക്ക്‌ ആവശ്യത്തിനു പ്രശസ്തിയും ലഭിച്ചെന്ന് ഞാന്‍ കരുതട്ടെ.
അത്‌ കൊണ്ട്‌ പ്രയോജനം ലഭിക്കാത്തവര്‍ക്ക്‌ എളുപ്പവഴിയില്‍
പ്രശസ്തനാകാനുള്ള/പ്രശസ്തയാകാനുള്ള കുറച്ച്‌ വഴികളാണ്‌
ഈ പ്രാവശ്യത്തെ എന്റെ ക്ലാസ്സില്‍ ഉള്‍പ്പെടുത്തിയിരിക്കുന്നത്‌.

നിങ്ങള്‍ ബ്ലോഗ്‌ തുടങ്ങി.
പോസ്റ്റുകള്‍ ഇട്ടും തുടങ്ങി.
ഇങ്ങോട്ട്‌ കമന്റ്‌ വരുത്തുന്നതിന്റെ ഭാഗമായിട്ട്‌ അങ്ങോട്ട്‌ ചെന്ന് കമന്റിട്ടും തുടങ്ങി.
എന്നിട്ടും നിങ്ങളുടെ ബ്ലോഗില്‍ ഒരു പൂച്ചക്കാളീം കയറുന്നില്ലേ.
നിങ്ങള്‍ക്ക്‌ നിങ്ങളുടെ ബ്ലോഗ്‌ കത്തിച്ച്‌ കളഞ്ഞിട്ട്‌ അടുത്ത ബസ്‌ പിടിച്ച്‌ കാശിക്ക്‌ പോകാന്‍ തോന്നുന്നുവോ.

വെയിറ്റ്‌,ബ്ലോഗ്‌ കത്തിക്കാന്‍ വരട്ടെ.ഞാന്‍ ഇനി പറയുന്ന കുറച്ച്‌ വിദ്യകള്‍ പരീക്ഷിക്കൂ.


1.നിലവില്‍ കൂടുതല്‍ കമന്റുകള്‍ കിട്ടുന്ന,അതിനി തമാശ ബ്ലോഗായാലും സീരിയസ്‌ ബ്ലോഗായാലും കവിതാ ബ്ലോഗായാലും,
നേരേ അങ്ങോട്ട്‌ കടന്ന് ചെല്ലുക.
അവിടെ ഒരു പടക്കം എറിഞ്ഞേക്കുക.പടക്കം വാങ്ങാന്‍ കടയിലേക്ക്‌ ഓടാന്‍ വരട്ടെ.
ഞാന്‍ ഉദ്ദേശിച്ചത്‌ എന്താണെന്ന് വച്ചാല്‍,
എല്ലാവരും-കൊള്ളാം,നന്നായി,കലക്കി,ഇനിയുമെഴുതുക,ചിരിപ്പിച്ചു എന്നൊക്കെ കമറ്റിടുന്നതിനിടയില്‍ കേറി ഒരു നെഗറ്റീവ്‌ കമന്റ്‌ ഇടുക.
എന്നു വച്ചാല്‍ ഇതാണോ കവിത,വെറുതെ കണ്ണടച്ച്‌ ഇരുട്ടാക്കരുത്‌.

അല്ലെങ്കില്‍ ഇതെന്ത്‌ ഹാസ്യം,കഴുതകരയുന്നതും തെന്നിവീഴുന്നതും ഹാസ്യമായിരുന്ന പണ്ടത്തെ വളിപ്പ്‌ സിനിമകളുടെ പ്രേതങ്ങള്‍ ആണല്ലോ ഈ ബൂലോഗം ഭരിക്കുന്നത്‌.ഇതില്‍ നിന്ന് വായനക്കാരനൊരു മോചനമില്ലേ.

അതുമല്ലേല്‍ കണ്ണീര്‍കഥകള്‍ ബ്ലോഗിലും ഒരു തീരാ ശാപമായി മാറുകയാണല്ലോ.ഇതിലും ഭേദം വല്ല സീരിയലും കാണാം.

മതി.

നിങ്ങള്‍ ശ്രദ്ധിക്കപ്പെട്ട്‌ കഴിഞ്ഞു.
ഒരു വിധപ്പെട്ടവനൊന്നും നിങ്ങള്‍ക്ക്‌ മറുപടി എഴുതില്ല.
മറുപടി എഴുതിയാല്‍ നിങ്ങള്‍ക്ക്‌ തിരിച്ച്‌ ചോദിക്കാം.
എന്താണ്‌ എഴുത്തുകാരാ,നിങ്ങള്‍ക്ക്‌ വിമര്‍ശത്തെ ഭയമാണോ.
സുഖിപ്പികുന്ന കമന്റുകള്‍ മാത്രമേ നിങ്ങള്‍ സ്വീകരിക്കുകയുള്ളൂ എന്നാണോ.

മതി,അപ്പോള്‍ നമ്മള്‍ ആരായി.
നല്ല ഒന്നാംതരം ചങ്കൂറ്റം ഉള്ളവന്‍.
പുലിമടയില്‍ കയറി വിമര്‍ശിച്ചവന്‍.നിങ്ങള്‍ പിന്നേം ശ്രദ്ധിക്കപ്പെട്ടു.

2.ഇത്‌ സ്ത്രീ ബ്ലോഗേഴ്സിന്‌ മാത്രമുള്ള വിദ്യയാണ്‌.
സ്ത്രീ ബ്ലോഗേഴ്സിന്‌ കമന്റുകള്‍ കുറയാനുള്ള സാധ്യത ഞാന്‍ കാണുന്നില്ല.
എന്നാലും നാല്‍പത്‌ വയസ്സ്‌ കഴിഞ്ഞവരാണെങ്കില്‍ അത്‌ പ്രൊഫയിലില്‍ വെളിപ്പെടുത്താതിരിക്കുകയാണ്‌ നല്ലത്‌.
വെറുതേയെന്തിനാ റിസ്ക്‌ എടുക്കുന്നത്‌.

നിങ്ങള്‍ കമന്റുകള്‍ ഇടുമ്പോള്‍ വാക്കുകളിലും വാക്യങ്ങളിലും പ്രത്യേക ശ്രദ്ധ വേണം.
അതായത്‌ ഇല്ല എന്ന വാക്ക്‌ ഇല്ല്യാ എന്നേ ഉപയോഗിക്കാവൂ.
ഉദാ;കിട്ടില്ല്യാ,വരില്ല്യാ,എനിക്കറിയില്ല്യാട്ടോ.
'ട്ടോ' എന്ന ശബ്ദം മിക്ക വരികളിലും കുത്തിക്കേറ്റാന്‍ കഴിഞ്ഞാല്‍ അത്രയും നല്ലത്‌.
അങ്ങനെ 'ട്ടോ' എന്ന ശബ്ദം ഉണ്ടാക്കി കൊണ്ട്‌ തന്നെ, നേരേ പോയി ഒരു ഫെമിനിസ്റ്റ്‌ ആകുക.

അങ്ങനെ വെറുതെയൊന്നും ഫെമിനിസ്റ്റ്‌ ആകാന്‍ പറ്റില്ല.

അതിന്‌ കുറച്ച്‌ പണിയുണ്ട്‌.തയ്യാറാണെങ്കില്‍ മാത്രം നിങ്ങള്‍ ഈ വഴി തിരഞ്ഞെടുക്കുക.
നിങ്ങളെ പ്രശസ്തയാക്കുന്ന കാര്യം ഞാനേറ്റു.

മഹിള,വനിത,സ്ത്രീ ഈ മൂന്ന് വാക്കുകള്‍ ഫില്‍ട്ടറില്‍ ഇടുക.
നിങ്ങള്‍ക്ക്‌ കമന്റ്‌ മെയില്‍ കിട്ടിയാല്‍ ഉടനേ പുറപ്പെടുക.
ഒന്നൊന്നര പുറം കവിയാതെയുള്ള ഒരു കമന്റ്‌ നേരത്തേ റെഡിയാക്കി വച്ചേക്കണം.
അതില്‍ പ്രത്യേകിച്ചൊന്നും വേണ്ട.
കടിച്ചാല്‍ പൊട്ടാത്ത,വീട്ടില്‍ ഉപയോഗിച്ചാല്‍ തെറിയാണെന്ന് വിചാരിച്ച്‌ നിങ്ങളുടെ ഭര്‍ത്താവ്‌ നിങ്ങളുടെ മുതുകത്തിട്ട്‌ ഇടിക്കാന്‍ ചാന്‍സുള്ള ടയിപ്പ്‌ വാക്കുകള്‍ കോര്‍ത്ത്‌ വച്ച ഒരഭ്യാസം.
ഈ കമന്റിന്റെ ഉടമ ഒരു സ്ത്രി ആയത്‌ കൊണ്ട്‌ വലിയ ചോദ്യം ചെയ്യലൊന്നും ഉണ്ടാകില്ല.ഞാന്‍ യോജികുന്നു,അനുകൂലിക്കുന്നു,ആ പറഞ്ഞത്‌ ശരിയാണ്‌ തുടങ്ങിയ കമന്റുകളുടെ ഇടയില്‍ ഒറ്റപ്പെട്ട രീതിയില്‍ ആരെങ്കിലും കേറി കോര്‍ത്താല്‍,ആദ്യമിട്ട കമന്റ്‌ തന്നെ കഠിനമായ പദങ്ങള്‍ തിരിച്ചും മറിച്ചുമിട്ട്‌ ഒന്നുകൂടി താങ്ങിയേക്കുക.
മതി,നിങ്ങള്‍ പ്രശസ്തയായി കഴിഞ്ഞു.

തല്‍ക്കാലം ഇതൊന്ന് പരീക്ഷിച്ച്‌ നോക്കുക.
വിജയിക്കാതിരിക്കില്ല.
വിജയിച്ചില്ലെങ്കില്‍ പുതിയ വഴികളുമായി ഞാന്‍ വീണ്ടും വരുന്നതു വരെ കാത്തിരിക്കുക.

ഹാപ്പി ബ്ലോഗിംഗ്‌

Thursday, April 26, 2007

എങ്ങനെ ബുദ്ധിജീവിയാകാം.

ബൂലോഗത്തില്‍ എങ്ങനെ ബുദ്ധിജീവിയാവാം.

ചോദ്യത്തില്‍ എന്തെങ്കിലും കുനുഷ്ട്‌ തോന്നുന്നുണ്ടോ.
എങ്കില്‍ ഈ ചോദ്യം ഒന്ന് പരിഷ്കരിക്കാം.

ബൂലോഗത്തില്‍ എങ്ങനെ ബുദ്ധിജീവി ചമയാം.
ഇപ്പോള്‍ ക്ലീയര്‍ ആയില്ലേ.
നിങ്ങള്‍ക്കും ബൂലോഗത്തിലെ ഒരു ബുദ്ധിജിവിയാകാം.
അതിനുള്ള കുറച്ച്‌ വഴികള്‍ ഞാന്‍ താഴെ വിവരിക്കാം.

ബുദ്ധിജീവി ചമയാന്‍ ജീവികള്‍ക്ക്‌ ബുദ്ധിവേണമെന്നില്ല.
വളരെ നിഷ്‌ പ്രയാസം സാധിക്കാവുന്ന ഒരു സംഗതിയാണത്‌.

ബുദ്ധിജീവി ചമയുന്നതിന്റെ ആദ്യപടി എന്താണെന്ന് വച്ചാല്‍,കുറച്ച്‌ പുസ്തകങ്ങള്‍ വാങ്ങിക്കൂട്ടുക.
വെറുതെ വാങ്ങിക്കൂട്ടിയാല്‍ മാത്രം മതി,ബുദ്ധിമുട്ടി വായിക്കണമെന്ന് നിര്‍ബന്ധമില്ല.
വേദങ്ങള്‍,ക്ലാസ്സിക്കുകള്‍ മുതല്‍ ഉത്തരാധുനിക സാഹിത്യകൃതികള്‍ വരെ ശേഖരത്തില്‍ ഉള്‍പ്പെടുത്തുക.

അതു കഴിഞ്ഞാല്‍ സ്വന്തമായി ഒരു ബ്ലോഗ്‌ നിര്‍മ്മിക്കുക.
ശേഷം ഒരു ഇടിവെട്ട്‌ പേരിടുക.
യവനം,ഭുവനം,കവനം,ചര്‍വ്വണം,പര്‍വ്വണം,കര്‍വ്വണം,ആന്തരികം,പാന്തരികം,കൂന്തരികം തുടങ്ങിയ രീതിയിലുള്ള കഞ്ചാവ്‌ പേരുകള്‍ ബ്ലോഗിനായി കണ്ടെത്തുക.
ഇനി നിങ്ങളും ഒരു നാമം കണ്ടെത്തണം.
ചരിത്രപുരുഷന്മാര്‍,പുരാണകഥാപാത്രങ്ങള്‍,ക്ലാസിക്കുകളിലെ നായകന്മാര്‍ തുടങ്ങിയവരുടെ പേരുകള്‍ ഒന്ന് പരിഷ്കരിച്ച്‌ ഒരു നെഞ്ച്‌ കലക്കി പേര്‍ ആക്കി മാറ്റി സ്വീകരിക്കുക.
ഉദാ-രാവണന്‍ എന്ന പേരില്‍ രാവണേട്ടന്‍,രാവണാത്മജന്‍,രാമരാവണന്‍,രവണന്‍,രാവണാസ്യന്‍ തുടങ്ങിയ രീതിയിലുള്ള പരിഷ്കാരങ്ങള്‍ നടത്തുക.

തുടര്‍ന്ന് ബ്ലോഗില്‍ ഒരു ഇന്‍ ട്രൊഡക്ഷന്‍ പോസ്റ്റ്‌ അവതരിപ്പിക്കുക.
അതില്‍ വേദങ്ങളില്‍ നിന്നുള്ള ഏതെങ്കിലും 2 വരി തീര്‍ച്ചയായും ഉപയോഗിച്ചിരിക്കണം.ഉദാ-'തമസോമാ ജ്യോതിര്‍ഗമയ','യഥാരാജാ തഥാ പ്രജാ','കാള പെറ്റു കയറെടുത്തു'.

പിന്നെ അവിടെ പോസ്റ്റുകളൊന്നും ഇട്ടേക്കരുത്‌.
നിര്‍ബന്ധമാണെങ്കില്‍ വല്ല വിഷുവിനോ ഓണത്തിനോ വല്ല ആശംസാപോസ്റ്റുകളും താങ്ങുക.
പിന്നെ വല്ല പ്രശസ്ത വ്യക്തികളും കാലം ചെയ്യുകയാണെങ്കില്‍ ഒരു അനുശോചന പോസ്റ്റും തട്ടിയേക്കുക.
ആ പോസ്റ്റിലെ വാചകങ്ങള്‍ നേരത്തേ കരുതി വച്ചിരിക്കുന്ന കൃതികളില്‍ നിന്നോ,തീര്‍ന്ന് പോയ മനുഷ്യന്‍ പുസ്തകം എഴുതുക തുടങ്ങിയ സാഹസങ്ങള്‍ ചെയ്തിട്ടുള്ള ആള്‍ ആണെങ്കില്‍ അദ്ദേഹത്തിന്റെ കൃതിയില്‍ നിന്നോ ആയിരിക്കണം.
രാവിലേ പത്രം വായിക്കുന്ന സ്വഭാവം ഉണ്ടെങ്കില്‍ മരിച്ചയാളിന്റെ ഏകദേശ ചരിത്രം കിട്ടുകയും,അതിനനുസരിച്ച്‌ പോസ്റ്റുകളിലെ വാചകങ്ങള്‍ നിയന്ത്രിക്കുകയും ചെയ്യാം.
വ്യക്തികള്‍ സാഹിത്യകലാ രംഗങ്ങളില്‍ ഉയര്‍ന്ന രംഗത്ത്‌ വിഹരിച്ചിട്ടുള്ളവരും,പൈങ്കിളി,കച്ചവട സിനിമ തുടങ്ങിയ നാണക്കേട്‌ ശാഖകളില്‍ അല്‍പം പോലും പ്രവര്‍ത്തിച്ചിട്ടില്ലാത്തവരും ആകേണ്ടതാകുന്നു എന്ന കാര്യം പ്രത്യേകം ശ്രദ്ധിക്കണം.

ഈ രീതിയിലുള്ള സ്വന്തം പോസ്റ്റുകള്‍ കഴിഞ്ഞാല്‍ പിന്നെ, ബൂലോഗത്ത്‌ ഒരു ബുദ്ധിജീവിക്ക്‌ ചെയ്യാനുള്ളത്‌,അല്ലെങ്കില്‍ ഒരു ബുദ്ധിജീവി ഇവിടെ ജിവിക്കുന്നു എന്ന് നാട്ടുകാര്‍ അറിയാനുള്ള മാര്‍ഗ്ഗം തുടരെ തുടരെ കമന്റുകള്‍ ഉല്‍പ്പാദിപ്പിക്കുക എന്ന പ്രക്രിയയില്‍ കൂടിയാകുന്നു.
കമന്റുകള്‍ നിര്‍വഹിക്കേണ്ടവിധം എങ്ങനെയാണെന്ന് വച്ചാല്‍,ആദ്യമായി, നിലവില്‍ ബൂലോഗത്തുള്ള കൂടിയ സൈസ്‌ ബുദ്ധിജീവികളുടെ ലിസ്റ്റ്‌ എടുക്കുക.അവരുടെ പോസ്റ്റുകള്‍ കണ്ടെത്തുക.അത്‌ എങ്ങനെയാണെന്ന് വച്ചാല്‍,പോസ്റ്റുകള്‍ എല്ലാം വായിക്കുന്നതിനിടയില്‍,വായിച്ചിട്ട്‌ ഇത്‌ മലയാളം തന്നെയാണോ എന്ന് സംശയം തോന്നിപ്പിക്കുന്ന രചനകള്‍ വല്ലതും തടയുകയാണെങ്കില്‍ തീര്‍ച്ചയാക്കുക,അത്‌ ഒരു ബുദ്ധിജീവി രചനയാകുന്നു.ആദ്യ കമന്റ്‌ അവിടെ തന്നെ ആയിക്കോട്ടെ.പുസ്തകശേഖരത്തില്‍ നിന്ന് ഒരു കടുകട്ടി ഇനം തപ്പിയെടുക്കുക.ദൈവവിശാസിയാണെങ്കില്‍ ഇപ്പോഴത്തെ ദേവസ്വം മന്ത്രിയെ മനസ്സില്‍ ധ്യാനിച്ച്‌ കൊണ്ടും,ഇനി ദൈവ വിശാസിയല്ലായെങ്കില്‍ വെള്ളാപ്പള്ളിയെ ധ്യാനിച്ച്‌ കൊണ്ടും പുസ്തകത്തിന്റെ ഏതെങ്കിലും ഒരു പേജ്‌ തുറക്കുക.കണ്ണില്‍പ്പെടുന്ന ആദ്യ നാലുവാചകങ്ങള്‍ കമന്റ്‌ രൂപത്തില്‍ ആ പോസ്റ്റില്‍ ഇട്ടേക്കുക.കഴിഞ്ഞു,ഇനി ആ പ്രദേശത്തേക്ക്‌ പോകരുത്‌.പോസ്റ്റിട്ടവന്‍ ഏതായാലും ആ കമന്റിനെ ചോദ്യം ചെയ്യാന്‍ സാധ്യതയില്ലാ.കാരണം സ്വന്തം കൃതിയില്‍ എഴുതിപ്പിടിപ്പിച്ചിരിക്കുന്ന കാര്യങ്ങള്‍ ആനയാണൊ കുതിരയാണോ എന്ന് അയാള്‍ക്ക്‌ തന്നെ വലിയ നിശ്ചയം ഉണ്ടാകില്ല.ഇനി വേറെ വായനക്കാര്‍ ആരെങ്കിലും ചോദ്യം ചെയ്യുകയാണെങ്കില്‍ മറ്റൊരു കടുകട്ടി കൃതി തുറക്കുക,നാലുവാചകം പിന്നേയും പ്രയോഗിക്കുക.അതിനേയും ചോദ്യം ചെയ്യുകയാണെങ്കില്‍,ഇനി ഈ പോസ്റ്റില്‍ ഒരു തര്‍ക്കത്തിലേര്‍പ്പെടാന്‍ ഞാന്‍ ഇല്ലെന്നും നമുക്ക്‌ ചാറ്റ്‌ വഴിയോ മെയില്‍ വഴിയോ അങ്കം വെട്ടാം എന്ന് പറഞ്ഞ്‌ മെയില്‍ അഡ്രസ്‌ അവിടെ ഉപേക്ഷിക്കുക.എതിരാളി ചാറ്റാന്‍ വന്നാല്‍,അവിടെ വച്ച്‌, അവന്റെ കാലിലേക്ക്‌ വീഴുക.എതിരാളി, മേലില്‍ ഏതെങ്കിലും തര്‍ക്കത്തില്‍ ഏര്‍പ്പെടുമ്പോള്‍ പിന്തുണയും വാഗ്ദാനം ചെയ്യുക.

ഒരു കാരണവശാലും ഹാസ്യകൃതികളില്‍ ആദ്യമേ കേറി കമന്റിടരുത്‌ എന്നുള്ളതായിരിക്കണം ഒരു ബുദ്ധിജീവിയായിരിക്കാന്‍ വേണ്ട അടുത്ത സ്റ്റെപ്പ്‌.കൂമ്പാരം പോലെ കമന്റുകള്‍ കണ്ടാലും ആ പ്രദേശത്തേക്ക്‌ മൈയിന്‍ഡ്‌ ചെയ്യരുത്‌.ബുദ്ധിജീവി ഗണത്തില്‍ പെട്ട വേറെ ആരെങ്കിലും അവിടെ കമന്റിടുന്നുണ്ടോ എന്ന് സസൂക്ഷ്മം നിരീക്ഷിക്കുകയും വേണം.അങ്ങനെയുള്ള കമന്റുകളുടെ എണ്ണം,അഞ്ച്‌ എന്ന അക്കം കടന്നാല്‍ നമ്മളും ഇടപെടുക.ഇവിടെ അയ്യപ്പപണിക്കര്‍,അയ്യപ്പന്‍,ചുള്ളിക്കാട്‌,കടമ്മനിട്ട,സച്ചിതാനന്ദന്‍ തുടങ്ങിയ കവികളുടെ കൃതിയില്‍ നിന്നുമുള്ള വരികള്‍ കമന്റായി ഉപയോഗിക്കണം.ഹാസ്യകൃതിയില്‍ കടമ്മനിട്ടക്ക്‌ എന്ത്‌ കാര്യം എന്ന് ചിന്തിച്ച്‌ തലപുകക്കുകയൊന്നും വേണ്ട.
വച്ച്‌ കീറുക,ഡോണ്ട്‌ വറി.
ഇതൊക്കെ തന്നെ ബുദ്ധിജീവി.

അടുത്ത സ്റ്റെപ്പ്‌, പഠനം അകുന്നു.മറ്റുള്ളവരുടെ കൃതികളെക്കുറിച്ചുള്ള പഠനം.പഠനത്തിനായി സ്ത്രീ ബ്ലോഗറുമ്മാരുടെ കൃതികള്‍ കൂടുതലായി ഉപയോഗിക്കുന്ന പ്രവണത ബൂലോഗത്ത്‌ കണ്ട്‌ വരുന്നതിനാല്‍ നിങ്ങളും ആ വഴി തന്നെ പിന്തുടരുക.ഉപമ,ഉപയുടെ പുറത്ത്‌ ഉപമ,വന്‍ കൃതികള്‍ മേശപ്പുറത്ത്‌ വിതറിയിട്ടുകൊണ്ടുള്ള ഉപമ,ഇതൊക്കെ പരീക്ഷിക്കാം.വേണമെങ്കില്‍ ഒരു പഠനപോസ്റ്റ്‌ പോലും പുറത്തിറക്കാന്‍ നിങ്ങള്‍ തയ്യാറാകണം.അവസാനം ആ പെങ്കൊച്ച്‌ സഹികെട്ട്‌ നിങ്ങളുടെ തന്തക്ക്‌ വിളിക്കുന്നത്‌ വരെ പഠനം തുടരുക.

ഒരു കാരണവശാലും പുതുമുഖങ്ങള്‍ക്ക്‌ സ്വാഗതം പറയുകയോ,അവരുടെ ആദ്യകാല കൃതികളില്‍ കമന്റ്‌ പറയുകയോ ചെയ്യരുത്‌.ഇനി പുതുമുഖം ഒരു പുലിയാണെങ്കില്‍,അതായത്‌ മറ്റുള്ള രംഗത്ത്‌ വ്യക്തിമുദ്ര പതിപ്പിച്ച ശേഷം സൈബര്‍ രംഗത്തേക്ക്‌ ആദ്യമായി കടന്ന് വരുന്ന വ്യക്തിയാണെങ്കില്‍ ആദ്യ സ്വാഗതം നമ്മുടെ തന്നെ ആയിരിക്കണം.അദ്ദേഹം കടന്ന് വന്നത്‌ നമ്മള്‍ അദ്യം അറിഞ്ഞില്ലാ എങ്കില്‍,പത്ത്‌ മുപ്പത്‌ സ്വാഗതകമന്റുകള്‍ക്ക്‌ ശേഷം മാത്രമുള്ള നമ്മുടെ സ്വാഗതകമന്റ്‌ ബഹളത്തില്‍ മുങ്ങി പോകും.അങ്ങനെ മുങ്ങാതിരിക്കാന്‍ ചെയ്യേണ്ടത്‌ എന്താണെന്ന് വച്ചാല്‍ അവിടെ രംഗത്തിറക്കേണ്ടത്‌ എതിര്‍പ്പിനെയാകുന്നു.പ്രമുഖന്റെ ആദ്യകാല പ്രവൃത്തികളില്‍ നിന്നുള്ള നെഗറ്റീവ്‌ സംഭവങ്ങളെ പര്‍വതീകരിച്ച്‌ കമന്റുകളുടെ രൂപത്തിലാക്കുകയും,വീട്ടില്‍ പോടാ എന്ന് ആക്രോശിക്കുകയും ചെയ്യുക.

വിവാദങ്ങളില്‍ തീര്‍ച്ചയായും ഇടപെടണം. തന്റെ വാദങ്ങള്‍ വ്യക്തമായ രീതിയില്‍ തന്നെ അവതരിപ്പികുകയും വേണം.അതായത്‌ പോസ്റ്റിട്ടവനോ,വായിക്കുന്നവനോ,വാദിക്കുന്ന തനിക്ക്‌ തന്നെയോ ഒന്നും മനസ്സിലാക്കാന്‍ പറ്റാത്ത രീതിയിലായിരിക്കണം കമന്റുകള്‍ ഇടേണ്ടത്‌.ചര്‍ച്ചകളില്‍ രണ്ടോ,അതില്‍ കൂടുതലോ പക്ഷങ്ങള്‍ ഉണ്ടാകാം.ഒരു പക്ഷത്തിനും നമ്മള്‍ ഏത്‌ ഭാഗത്താണെന്ന് മനസ്സിലാകാത്ത രീതിയില്‍ വേണം ഇടപെടാന്‍.അതായത്‌ ചര്‍ച്ച ഇറാഖിനെക്കുറിച്ചാണെങ്കില്‍ നമ്മള്‍ ശ്രീലങ്കയെക്കുറിച്ച്‌ പറയുക.അപ്പോള്‍ ചര്‍ച്ച തിരിഞ്ഞ്‌ വളഞ്ഞ്‌ ലങ്കയിലേക്ക്‌ എത്തുകയാണെങ്കില്‍ നമ്മള്‍ ബാള്‍ട്ടിമോറിലെ കാപ്പിക്കുരുവിനെക്കുറിച്ച്‌ പറയുക.അവസാനം സഹികെട്ട്‌ ആ ബ്ലോഗിന്റെ ഉടമ ആ പോസ്റ്റ്‌ ഡിലീറ്റ്‌ ചെയ്യുന്നതുവരെ ചര്‍ച്ച തുടരുക.

ഏത്‌ പോസ്റ്റിലാണെങ്കിലും കമന്റുകള്‍ ഒന്നരപ്പുറത്തില്‍ കവിഞ്ഞിരിക്കണം.പിന്മൊഴി നിറയണം.അതായത്‌ ജനം മുഴുവന്‍ വായിക്കരുത്‌.സഹികെട്ട്‌,ഇവനൊരു ബുദ്ധിജിവി പിശാച്‌ ആണെന്ന് തോന്നുന്നു,വലിയ ശല്യമായല്ലോ എന്ന് പറയിപ്പിക്കണം.അങ്ങനെ പറയിപ്പിക്കാന്‍ കഴിയുന്നതുവരെ ശ്രമിക്കുക.
ഈ മാതിരി അഭ്യാസങ്ങള്‍ കൊണ്ട്‌ ഒരു ചെറിയ ബുദ്ധിജീവി ഇമേജ്‌ ഉണ്ടാക്കിയെടുക്കാന്‍ സാധിക്കും.ഇനി ഇതൊക്കെ പരീക്ഷിച്ച്‌ പരാജയപ്പെട്ടാല്‍,വിഷമിക്കാതിരിക്കുക,എന്റെ അടുത്ത പോസ്റ്റില്‍ ഈ രീതികള്‍ പരാജയപ്പെടാനുള്ള സാധ്യതകള്‍,മറികടക്കാനുള്ള വഴികള്‍ ഇവയൊക്കെ വളരെ വിശദമായി പ്രതിപാദിക്കുവാന്‍ സാധിക്കുമെന്ന് പ്രതീക്ഷിക്കുന്നു.
കാത്തിരിക്കുക.വിജയം നിങ്ങളുടേതാകുന്നു.


[ചില വെടക്ക്‌ പിള്ളേരുണ്ട്‌,ഈ ബൂലോഗത്ത്‌.ആ പ്രദേശത്തെങ്ങും ഈ അഭ്യാസവും കൊണ്ട്‌ ചെല്ലരുത്‌.അതുങ്ങള്‍ ഒടിച്ച്‌ മടക്കി പെട്ടീലാക്കി വീട്ടിലേക്ക്‌ കൊറിയര്‍ ചെയ്യും]

Friday, April 20, 2007

ഇവിടെ തുടങ്ങുന്നു

ആര്‍ക്കെങ്കിലും സ്വന്തം കൃതികളുടെ പഠനം,അല്ലെങ്കില്‍ മറ്റുള്ള ബ്ലോഗേഴ്സിന്റെ കൃതികളുടെ ചങ്ക്‌ കലക്കുന്ന വിമര്‍ശനം എന്നിവക്ക്‌ സമീപിക്കുക.
വിമര്‍ശിച്ച്‌ കൊടുക്കപ്പെടും,കൃതികളുടെ പഠനം നടത്തികൊടുക്കപ്പെടും,നിങ്ങള്‍ സ്വപ്നത്തില്‍ പോലും വിചാരിക്കാത്ത അര്‍ഥങ്ങള്‍ നിങ്ങളുടെ കവിതക്ക്‌ കണ്ടെത്തി നിങ്ങളെ ഒരു വന്‍ എഴുത്തുകാരനാക്കി മാറ്റും,അങ്ങനെ ഒരു വലിയ സാധ്യത നിങ്ങളുടെ മുന്‍പില്‍ ഞാന്‍ തുറക്കുന്നു.

അപ്പോള്‍ നിങ്ങള്‍ കടന്ന് വരില്ലേ.

എന്ന് നിങ്ങളുടെ സ്വന്തം ബുദ്ധിജീവി.